Bakıda ölümlə nəticələnən qəza törətmiş qadına ağır cəza verildi

Bakıda ölümlə nəticələnən yol-nəqliyyat hadisəsi törətməkdə təqsirləndirilən Gülnarə Eynullayevanın cinayət işi üzrə məhkəmə prosesi başa çatıb.

Publika.az Teleqraf-a istinadla xəbər verir ki, bu gün Bakı Ağır Cinayətlər Məhkəməsində hakim Aygün Qurbanovanın sədrliyi ilə keçirilən prosesdə dövlət ittihamçısı çıxış edib.

Prokuror Gülnarə Eynullayevanın 3 il sürücülük hüququndan məhrum edilməklə 8 il azadlıqdan məhrum olunmasını təklif edib.

Daha sonra prosesdə hökm oxunub.

Gülnarə Eynullayeva 3 il sürücülük hüququndan məhrum edilməklə 6 il 9 ay 3 gün müddətinə azadlıqdan məhrum edilib.

Qeyd edək ki, hadisə paytaxtın Nərimanov rayonu, Z.Bünyadov prospektində qeydə alınıb. Bakı şəhər sakini, 1981-ci il təvəllüdlü Eynullayeva Gülnarə Rasim qızı idarə etdiyi avtomobillə hərəkətdə olarkən idarəetməni itirib, yolayrıcı səddi aşaraq əks istiqamətdə hərəkətdə olan paytaxt sakini, 1990-cı il təvəllüdlü Qurbanov Səid Elmar oğlunu idarə etdiyi avtomobillə toqquşub.

S.Qurbanov hadisə yerində ölüb, G.Eynullayeva və sərnişinləri - 2000-ci il təvəllüdlü Bağırov Nicat Arzu oğlu və 1981-ci il təvəllüdlü Abbasov Səbuhi İslam oğlu aldıqları xəsarətlərlə xəstəxanaya yerləşdiriliblər.

Gülnarə Eynullayevaya qarşı Cinayət Məcəlləsinin 263-1.3-cü maddəsi ilə ittiham irəli sürülüb.