Gəmi qəzasına görə saxlanılan 3 azərbaycanlı ilə bağlı qərar

Şimali Kipr Türk Cümhuriyyətində gəminin batması nəticəsində 14 nəfərin itkin düşməsi ilə bağlı aparılan istintaq çərçivəsində növbəti məhkəmə iclası keçirilib.

Bu barədə Publika.az-a Azərbaycan-Kipr Dostluq Cəmiyyətinin mətbuat xidmətindən bildirilib.

Məhkəmənin qərarı ilə hadisə ilə bağlı saxlanılan 9 nəfərin, o cümlədən gəmi heyətinin 8 üzvünün polis nəzarətində saxlanılma müddəti daha 7 gün uzadılıb.

Hadisə ilə bağlı “ehtiyatsızlıq nəticəsində ölümə səbəb olma” ittihamı üzrə istintaq davam etdirilir.

Gəmi heyətində üç Azərbaycan vətəndaşı – Rəşad İbrahimov, Qədir Quliyev və Valeh Hümbətov çalışıb. Onlar gəmidə matros, yağlayıcı və köməkçi heyət vəzifələrində çalışıblar.

Vurğulanıb ki, bu gün keçirilən məhkəmə iclasında Azərbaycan vətəndaşı olan heyət üzvlərinə qarşı ayrıca ittiham elan edilməyib.

Azərbaycan-Kipr Dostluq Cəmiyyətinin sədri Orxan Həsənoğlu Azərbaycan vətəndaşı olan heyət üzvlərinin istintaq çərçivəsində hüquqi statusunun obyektiv şəkildə qiymətləndirilməsinin vacibliyini bildirib.

O qeyd edib ki, Azərbaycan vətəndaşları şübhəli şəxs qismində deyil, baş vermiş faciənin ən yaxın şahidləri kimi dindirilməlidirlər: "Onların gəminin idarə olunması, texniki vəziyyəti və səfərə yararlılığı ilə bağlı qərarların qəbul edilməsində əsas səlahiyyət sahibi olmadıqları nəzərə alınmalıdır".

O.Həsənoğlunun sözlərinə görə, hazırda aparılan istintaq çərçivəsində gəminin kapitanı, ikinci kapitan, baş mexannik və köməkçi mexannik gəminin idarə olunması, texniki vəziyyəti və səfərə hazırlığı ilə bağlı əsas məsul şəxslər sırasında qiymətləndirilir:

“Gəminin texniki vəziyyətinin, səfərə yararlılığının və hərəkətə buraxılmasının qiymətləndirilməsi digər köməkçi heyət üzvlərinin əsas vəzifələri sırasında olmaya bilər”.

O bildirib ki, Azərbaycan vətəndaşı olan heyət üzvləri hadisə zamanı gəmini son anda tərk edib və sərnişinlərə kömək göstərmək üçün öz həyatlarını riskə atıblar.