Hadisə

Şəkidə qadın "baş leytenant" TUTULDU

26 Aprel 2016 13:32

Şəki şəhərində dələduzluq edən qadın saxlanılıb.

ANS PRESS-in məlumatına görə, saxlanılan şəxs 19 yaşlı Şəki şəhər sakini Əfəndiyeva Sahilə İbrahimxəlil qızıdır.

Onu obyektlərin birində əynində polis baş leytenantı paltarı ilə yaxalayıblar. Sahilə Əfəndiyeva polislərin diqqətini ayaqqabısı ilə cəlb edib. Belə ki, onun əynində polis forması olsa da ayağında idman ayaqqabısı "krasovka" olub.

Ehtimal edilir ki, əynində polis geyimi, ayağında "krasovka" olan qız dələduzluqla məşğul olubmuş.

Hazırda o, hüquq-mühafizə orqanları tərəfindən saxlanılıb və bu geyimi ilə kimləri aldatdığı, formanı necə əldə etdiyi araşdırılır.

Adıçəkilən 19 yaşlı Şəki şəhər sakini ötən il də saxlanılıb. O, telefon oğurluğunda şübhəli bilinərək saxlanılıb. Lakin sonradan əməlindən peşman olduğunu deyərək sərbəst qala bilib.