Bakıda "bomj" qırğını

Bakıda qətl hadisəsi baş verib. Hadisə Nəsimi rayonu ərazisində qeydə alınıb.

Rayonun Polis İdarəsindən ANS PRESS-ə verilən məlumata görə, Həzi Aslanov küçəsində 1978-ci il təvəllüdlü Ruslan Çingiz oğlu Cavadovun üzərində çoxsaylı xəsarətlər olan meyiti aşkarlanıb. Polis və prokurorluq orqanları əməkdaşlarının həyata keçirdikləri əməliyyat-axtarış və istintaq tədbirləri nəticəsində qətli törətməkdə şübhəli bilinən əvvəllər məhkum olunmuş- Astara rayon sakini Azad Mürsəlov və Babək rayon sakini Lətifə Zamanova tutulublar.

Qətlə yetirilən və onu öldürən şəxslərin tüfeyli həyat tərzi keçirmələri müəyyən edilib.

Hazırda qətlin dəqiq səbəbləri araşdırılır. Fakta görə, Nəsimi Rayon Prokurorluğunda cinayət işi açılıb, araşdırmalar davam etdirilir.

Bakıda bir neçə gün əvvəl də tüfeyli həyat keçirən şəxs öldürülüb. Nərimanov rayonu ərazisində, Əhməd Rəcəbli küçəsində 1960-cı il təvəllüdlü Rafis Əvəz oğlu Mirzəyev kəsilmiş-deşilmiş yara ilə xəstəxanaya aparılıb. Həkimlərin yardımına baxmayaraq 56 yaşlı şəxs xəstəxanada dünyasını dəyişib.

Mərhumun tüfeyli həyat keçirdiyi bildirilir və onun yıxılaraq xəsarət aldığı da istisna edilmirdi.