İdman

Futbolçuya silahlı hücum

11 Avqust 2015 19:21

"Fənərbağça"nın və Türkiyə millisinin futbolçusu Mehmet Topala silahlı hücum olub.

Publika.az xəbər verir ki, hadisə bu gün "Fənərbaxça"nın səhər məşqindən sonra yaşanıb. Belə ki, futbolçu məşqdən çıxdıqdan sonra şəxsi avtomobiliylə klubun bazasından uzaqlaşdığı zaman naməlum şəxslər avtomobilə atəş açmağa başlayıb.

Atəş nəticəsində güllələrdən biri avtomobilin ön şüşəsinə dəysə də, şüşələrin güllə keçirməyən materialdan olması futbolçunu xilas edib.

"Fənərbağça" klubu hadisədən dərhal sonra bəyanatla çıxış edərək, aidiyyəti qurumlardan təqsirkarların tapılmasını tələb edib.

Xatırladaq ki, bu, "Fənərbaxça"nın qarşılaşdığı ilk silahlı hücum deyil. "Sarı-göylər" Türkiyə Superliqasının son mövsümündə də bu cür hadisəylə üzləşmişdi. Belə ki, "Rizəspor"la oyundan sonra klubun avtobusu naməlum şəxslər tərəfindən odlu silahlardan atəşə tutulmuşdu. Bunun nəticəsində sürücü yaralansa da, ölüm hadisəsi qeydə alınmamışdı.