Azərbaycan Premyer Liqasında 2015/2016 mövsümünün 100-cü qolu vurulub.
Publika.az xəbər verir ki, yubiley qolu 10-cu turun “Qarabağ” - “Rəvan” matçına təsadüf edib.
Tofiq İsmayılov adına Suraxanı qəsəbə stadionunda keçirilən qarşılaşmada meydan sahiblərinə 1:0 hesablı qələbə qazandıran qol mövsümdə 100-cü olub. Belə ki, əvvəlki 9 turda 91 qol qeydə alınmışdı. Turun eyni vaxtda başlayan ilk 3 matçında 7 dəfə top qapıdan keçdiyindən, paralel oynanılan “Neftçi” - “İnter” və “Qarabağ” - “Rəvan” matçlarındakı 2-ci top mövsümdə 100-cü olmalıydı. Əvvəl “Neftçi”, 1 dəqiqə sonra “Qarabağ” hesabı açdığından, yubiley qolu ağdamlıların hesabına yazılıb.
Əlamətdar topu rəqib qapısından Vüqar Mustafayev keçirib. Bu da onun Premyer Liqada ilk qoludur. O, buna ümumilikdə 34-cü, “Qarabağ”da 6-cı çempionat matçında nail olub. Ümumilikdə isə 10 turun 50 oyununda 101 qol vurulub.
