17 yaşlıların Avropa çempionatına hansı kanalda baxaq?

17 yaşadək futbolçular arasında Bakıda keçiriləcək Avropa çempionatının yayım hüququ "CBC Sport" telekanalına verilib. Yarış eyni zamanda Eurosport-1 və Eurosport-2 televiziya kanallarında canlı yayımlanacaq.

Publika.az xəbər verir ki, oyunların çəkilişi və digər texniki məsələlərin həlli CBC Sport kanalı tərəfindən həyata keçiriləcək. Bu barədə "Report"a kanalın baş direktoru Volkan Üst məlumat verib. Onun sözlərinə görə, bütün oyunların çəkilişləri rəhbərlik etdiyi kanal vasitəsilə həyata keçiriləcək. V.Üst çempionatın oyunlarının yarısını yayımlayacaq "Eurosport" kanalına görüntülərin "CBC Sport" tərəfindən təqdim olunacağını deyib:

"Burada yalnız azərbaycanlı əməkdaşlar çalışacaq. Xaricdən heç bir dəstək olmadan özümüz oyunları yüksək səviyyədə tamaşaçılara təqdim edəcəyik. Bu, çox məsuliyyətli işdir. Belə mötəbər turnirdə işləmək bizim üçün asan deyil. Ancaq işimizin öhdəsindən layiqincə gələcəyik".

Telekanal rəhbəri çəkilişləri həyata keçirmək üçün lazımi avadanlığın olduğunu da bildirib:

"Çəkilişləri iki səyyar telestansiya vasitəsilə həyata keçirəcəyik. Bizim yüksək keyfiyyətli çəkiliş etmək və görüntüləri ötürmək üçün hər bir avadanlığımız var".

Qeyd edək ki, Avropa çempionatı 5-21 mayda keçiriləcək.