"Qəbələ"nin rəqibləri məğlub oldu

"Qəbələ" komandasının futbol üzrə Avropa Liqasının qrup mərhələsindəki rəqibləri öz ölkələrinin çempionatlarında növbəti oyunlarını keçiriblər.

"Report"un məlumatına görə, Azərbaycan təmsilçisi kimi, elə C qrupundakı hər 3 rəqibi də qələbə qazana bilməyib.

"Sent Etyen" Fransa Liqa1-in XII turunda "Mets"in qonağı olub. Görüş qolsuz tamamlanıb - 0:0. "Sent-Etyen" Usama Tannanenin 2 dəqiqə ərzində (35,36) 2 sarı vərəqə alaraq, meydandan qovulması üzündən oyunu azlıqda tamamlayıb. Tannane "Qəbələ" ilə noyabrın 3-də Bakıda keçirilmiş görüşdə bərabərlik qolunun müəllifi olmuşdu. Hazırda "Sent-Etyen" 12 oyundan 18 xalla 9-cu pillədə qərarlaşıb.

Noyabrın 24-də "Qəbələ"nin qonağı olacaq "Anderlext" Belçika Liqasında "Ostende"yə qarşı XIV tur matçından heç-heçə ilə ayrılıb - 1:1. Hər iki qol penaltidən vurulub. Əvəlcə 66-cı dəqiqədə Ostende"dən Frank Berrye, 82-ci dəqiqədə isə meydan sahiblərindən Yuri Tilemans fərqlənib. Bu nəticədən sonra "Anderlext" 14 oyundan 25 xalla 2-ci pillədə qərarlaşıb.

"Maynts" isə Almaniya Bundesliqasının X turunda səfərdə "Leyptsiq"lə qarşılaşmanı məğlub kimi tamamlayıb. Meydan sahiblərindən Timo Verner (dəq.3; 44), Emil Forsberq (dəq.21), qonaqlardan Ştefan Bell (dəq.74) dəqiq olub. Bu nəticədən sonra "Maynts" 10 oyundan 14 xalla 10-cu pillədə yer alıb.

Qeyd edək ki, "Qəbələ" Azərbaycan Premyer Liqasının XI turunu AZAL-la səfər heç-heçəsi ilə tamamlayıb.