İdman

Olimpiya məşəlini bu futbol əfsanəsi yandıracaq

8 May 2024 19:02

Fransa millisinin sabiq futbolçusu Zinəddin Zidan Marseldə Olimpiya məşəlini yandıracaq.

Publika.az xəbər verir ki, bu barədə “L’Equipe” məlumat yayıb.

Marseldə 19-cu əsrə aid üç dirəkli yelkənli “Belem” gəmisinin Yunanıstandan Olimpiya məşəli ilə Fransaya gəlişi münasibətilə bayram mərasimi keçirilir. Axşam gəmi limanda yanaşacaq və olimpiya məşəli quruya ötürüləcək.

Fransa torpağında Olimpiya məşəli estafetinin ilk iştirakçısı üzgüçü Florent Manaudu olacaq. O, məşəli adı çəkilməyən ikinci iştirakçıya ötürəcək. Üçüncü məşəlçi başlıq taxaraq estafetdən keçəcək və qazan yandırıldıqda üzünü açacaq. Proqram dəyişməsə bu adam Fransa futbolunun əfsanəsi Zinəddin Zidan olacaq.

Fransa ərazisində estafet 68 gün davam edəcək. İyulun 26-da Oyunların açılış mərasimində Olimpiya məşəlinin alovlanması ilə başa çatacaq.

Paris-2024 Yay Olimpiya Oyunları iyulun 26-dan avqustun 11-dək keçiriləcək.