İrqçi davranışın bədəli: 173 min avro

Serbiya Futbol Assosiasiyası UEFA Millətlər Liqasının oyunlarında azarkeşlərin davranışına görə cəzalandırılıb.

Publika.az xəbər verir ki, Avropa Futbol Assosiasiyaları İttifaqı Serbiya millisinin İsveçrə (15 noyabr) və Danimarka (18 noyabr) ilə oyunlarında azarkeşlərin hərəkətlərində pozuntular müəyyən edib.

İsveçrənin Sürix şəhərində keçirilən oyun zamanı azarkeşlər pirotexniki vasitələrdən istifadə edib, əşyalar atıb, idmana yaraşmayan pankartlar nümayiş etdirib, “irqçi və yaxud ayrı-seçkilik davranışı” nümayiş etdirib, stadiona və obyektlərə ziyan vurublar.

Həmçinin İsveçrədə keçirilən oyun zamanı serb azarkeşlər Albaniya bayrağını yandırmağa cəhd ediblər. Serbiyanın Danimarka ilə oyunu zamanı “irqçi və yaxud ayrı-seçkilik davranışı” və pirotexniki vasitələrdən istifadə faktları aşkarlanıb. Serbiya Futbol Assosiasiyası ümumilikdə 173 min avro cərimələnib, millinin növbəti ev oyununda tribuna qismən bağlı olacaq, iki səfər oyunu isə serb azarkeşlərsiz keçiriləcək.