Papanın dəfninə görə futbol oyunları təxirə salınacaq?

İtaliya A Seriyasının 34-cü turunun 26 aprel, şənbə gününə planlaşdırılan 3 oyunu eyni gündə Vatikanda baş tutacaq Papanın dəfn mərasimi ilə əlaqədar başqa bir tarixə təxirə salına bilər.

Publika.az xəbər verir ki, bu barədə "La Gazzetta dello Sport" məlumat yayıb.

Papanın dəfn mərasiminə on minlərlə insanın qatılacağı gözlənilir ki, bu da İtaliya polisini əlavə gərginliyə salır. Hüquq-mühafizə orqanları futbol oyunları zamanı asayişi qorumaq üçün kadr çatışmazlığı ilə üzləşə bilər.

Aprelin 26-da İtaliya çempionatında üç qarşılaşma nəzərdə tutulub: “Komo” – “Cenoa”, “İnter” – “Roma” və “Latsio” – “Parma”. Ən çox ehtimal olunan nəticə isə Romada baş tutacaq son oyunun təxirə salınmasıdır. Çox güman ki, “Latsio” – “Parma” matçı aprelin 28-i bazar ertəsinə təxirə salınacaq.

Maraqlıdır ki, “Latsio” bundan əvvəl A Seriyasına Papanın dəfn mərasimində iştirak etmək istəklərinə görə matçın təxirə salınması ilə bağlı müraciət etmişdi, lakin liqa bu tələbi rədd etmişdi.

Heybət