İdman

ECA-dan təklif: ÇL-in gəlirlərindən bu klublara pay ayrılacaq?

12 May 2025 23:13

Avropa Klublar Assosiasiyası (ECA) UEFA turnirlərində maliyyə bərabərsizliyini azaltmaq məqsədilə yeni təşəbbüslə çıxış edib.

Publika.az xəbər verir ki, təşkilat təklif edir ki, Çempionlar Liqası və digər UEFA yarışlarından əldə olunan yayım və reklam gəlirlərinin azı 5%-i bu turnirlərdə iştirak etməyən, lakin orada oynayan futbolçuları karyeralarının əvvəlində yetişdirmiş klublara verilsin.

Hazırkı mövsüm üzrə Çempionlar Liqası, Avropa Liqası və Konfrans Liqasının ümumi gəliri təxminən 4,44 milyard avro təşkil edəcək. Bu təklifə əsasən, bu məbləğin 5%-i, yəni 220 milyon avro bu məqsəd üçün ayrılacaq.

ECA-nın hesablamalarına görə, bu təşəbbüs çərçivəsində Avropadakı 400 kiçik klubun hər biri təxminən 440 min avro maliyyə vəsaiti əldə edə bilər.

Bu addım həm gənc futbolçuların inkişafına töhfə verən klubların dəstəklənməsi, həm də futbolda iqtisadi balansın qorunması baxımından mühüm dəyişiklik kimi qiymətləndirilir.