Haaland milyonluq avtomobil kolleksiyasına daha birini əlavə etdi - FOTO

“Mançester Siti”nin norveçli ulduzu Erlinq Haalandın eksklüziv avtomobillərə olan sevgisi yenidən azarkeşlərin diqqətini çəkib.

Publika.az xəbər verir ki, 25 yaşlı hücumçu “Etihad”ın məşq bazasını təxminən 200 min funt sterlinq dəyərində olan yeni güclü “Ford Shelby F-150” pikapının sükanı arxasında tərk edərkən görüntülənib.

Bu “monstr” pikap 5 litrlik V8 mühərriki ilə təchiz olunub və 0-dan 60 mil/saat sürətə cəmi 3,4 saniyəyə çata bilir. Model “Ford F-150” bazasında yaradılıb, lakin “Shelby American” tərəfindən edilən dərin tüninq nəticəsində onu mühəndislik sənətinin əsl nümunəsinə çevirib.

“Ford Shelby F-150” məhdud sayda istehsal olunan, illik cəmi bir neçə yüz ədəd buraxılan seriyadır ki, bu da onu kolleksiya dəyəri olan unikal avtomobilə çevirir. Bundan əlavə, pikap 5 tona qədər yük çəkmək gücünə malikdir və lüks, sürət, həm də praktiklik xüsusiyyətlərini birləşdirir.

Xatırladaq ki, Haalandın artıq dəyəri bir neçə milyon funt olan avtomobil parkı var. O, mart ayında 4 milyon funt sterlinqə nadir “Bugatti Tourbillon” alıb. May ayında isə norveçli futbolçunun 320 min funt sterlinq dəyərində parlaq sarı “Ferrari 812 Superfast” aldığı bildirilmişdi.