FİFA futbolçularla bağlı qaydaları dəyişəcək? - Görüş oldu

FİFA qarşıdakı bir neçə il ərzində futbolçuların həyat şəraitinin yaxşılaşdırılması ilə bağlı addımlar atacaq.

Publika.az xəbər verir ki, bununla əlaqəli ideyalar dünya futbol rəhbərliyi və bir neçə oyunçu həmkarlar ittifaqları arasında keçirilən görüşdə müzakirə olunub. Bu barədə FİFA-nın rəsmi saytı məlumat yayıb.

Mərakeşdə keçirilən iclas zamanı futbolçuların iş şəraitinə dair bir sıra əsas təşəbbüslər qəbul edilib. Bunlar oyunlar arasında ən azı 72 saatlıq istirahətin təmin edilməsi, mövsümlərarası fasilədə minimum 21 günlük istirahət dövrün yaradılması və həftədə bir istirahət günü şərait yaradılmasıdır.

Bundan əlavə, uzaq səfərlər və futbolçuların qarşılaşdığı iqlim şəraiti ilə bağlı əlavə tədbirlərin görülməsinin vacibliyi də vurğulanıb. Bu məsələlər gələcəkdə digər maraqlı tərəflərlə birgə daha ətraflı müzakirə ediləcək.

Görüş zamanı həmçinin bildirilib ki, FİFA maliyyə çətinlikləri səbəbindən klublarından maaş ala bilməyən peşəkar futbolçular üçün maliyyə dəstək fondu yaradacaq.

Heybət