Tanınmış futbolçu 30 yaşında karyerasını başa vurur

Dortmund “Borussiya”sının müdafiəçisi Niklas Züle 2025/26 mövsümünün son Bundesliga turundan sonra futbolçu karyerasını başa vuracaq.

Publika.az xəbər verir ki, bu barədə 30 yaşlı futbolçu “Spielmacher” podkastında bildirib:

“Yayda karyeramı başa vuracağımı açıqlamaq istəyirəm. Hoffenhaymdakı paltardəyişmə otağında həkim mümkün çarpaz bağ qopmasını müəyyən etmək üçün test aparanda fizioterapevtə baxıb başını yellədi. Fizioterapevt də yoxladı və o da sabitlik hiss etmədi. Mən duş otağına gedib 10 dəqiqə ağladım. Həmin an həqiqətən düşündüm ki, hər şey bitdi, bağ qopub.

Ertəsi gün MRT-yə gedəndə və yaxşı xəbəri alanda – yəni çarpaz bağın qopmadığını öyrənəndə mənim üçün hər şey yüz faiz aydın oldu ki, artıq son nöqtəni qoymalıyam. Futboldan sonrakı həyatdan zövq almağı təsəvvür edirdim – sərbəst olmaq, istirahətə getmək, uşaqlarımla vaxt keçirmək, amma eyni zamanda üçüncü dəfə çarpaz bağ zədəsi ilə mübarizə aparmaq fikri mənə dəhşətli gəlirdi”.

Zülenin “Borussiya” ilə müqaviləsi 30 iyun 2026-cı ildə başa çatır. O, 2022-ci ilin iyulundan Dortmund klubunda çıxış edir. Müdafiəçi 2025/26 mövsümündə keçirdiyi 12 oyunda 1 məhsuldar ötürmə edib.

Futbolçu daha əvvəl “Hoffenhaym” və “Bavariya”nın da formasını geyinib. Almaniya millisində isə 49 oyunda 1 qol vurub.

Züle “Bavariya” ilə birlikdə beş dəfə Almaniya çempionu olub, iki dəfə Almaniya Kubokunu qazanıb. O, həmçinin UEFA Çempionlar Liqasının, Almaniya Superkubokunun (4 dəfə), UEFA Superkubokunun və klublararası dünya çempionatının qalibi adını qazanıb.