“Real”da gərginlik pik həddə: Arbeloanın neçə futbolçu ilə problemi var?

“Real”da baş məşqçi Alvaro Arbeloa ilə komanda daxilində münasibətlərin gərgin olduğu bildirilir.

Publika.az xəbər verir ki, bu barədə “Marca” nəşri məlumat yayıb.

Mənbənin iddiasına görə, ən azı altı futbolçu baş məşqçi ilə ünsiyyət saxlamır. Bundan əlavə, kollektiv daxilində oyunçular arasında da fikir ayrılıqları mövcuddur.

Daha əvvəl Orelyen Çuameni ilə Federiko Valverde arasında münaqişə yaşandığı bildirilmişdi. Futbolçular məşqin sonunda az qala dava etmiş, mübahisəni paltardəyişmə otağında davam etdirmişdilər. Qarşıdurmanın səbəbi açıqlanmamışdı.

Son olaraq isə mərkəz müdafiəçisi Antonio Rüdiger komanda yoldaşı Alvaro Karrerasın üzünə sillə vurmuşdu.

Bir müddət əvvəl KİV-də yayılan məlumatlarda “Real”ın bir sıra futbolçularının fransalı hücumçu Kilian Mbappenin komandada xüsusi münasibət və status almasından narazı olduğu qeyd olunurdu. Bundan sonra sosial şəbəkələrdə 27 yaşlı futbolçunun “Kral klubu”ndan göndərilməsi tələbi ilə onlayn petisiya başladılmışdı.

Bütün bu neqativ hadisələr Madrid təmsilçisinin La Liqanın 2025/26 mövsümünün 35-ci turunda “Barselona”ya qarşı keçiriləcək “El-Klasiko” öncəsi düşərgəsində yaşanır. Oyun mayın 10-da Bakı vaxtı ilə saat 23:00-da başlayacaq. “Barsa” 88 xalla liderdir, “kral klubu”nun isə aktivində 77 xal var.