Azərbaycan texnologiyaları Avropa və Afrikada tətbiq olunacaq

25 noyabrda Azərbaycanın SINAM şirkəti və Litvanın BS/2 şirkəti bank sistemində birgə fəaliyyət üzrə əməkdaşlıq memorandumu imzalayıb. Memorandum Azərbaycan Banklar Assosiasiyası, Mərkəzi Bank və İqtisadi İslahatlar və Kommunikasiya Mərkəzinin dəstəyi ilə keçirilən VI Beynəlxalq bank Forumunda təsdiqlənib.

Publika.az xəbər verir ki, əməkdaşlıq çərçivəsində sima üzərindən şəxsiyyəti təsdiq edən proqram təminatının Litva şirkətinin Avropa və Afrika ölkələrindəki bankomat şəbəkəsində tətbiq edilməsi nəzərdə tutulub.

İlkin mərhələdə SINAM və BS/2 şirkətlərinin birgə həlli bankomat vasitəsilə ani kreditlərin alınması üçün istifadə ediləcək.

Əməkdaşlığın növbəti mərhələlərində birgə həllərin əhatə dairəsinin genişləndirilməsi də planlaşdırılır.

Bunu da qeyd edek ki, SINAM şirkəti Transxəzər və Orta Asiya regionlarında çoxsaylı İT məhsul və xidmətləri, elektron hökumət həllərini, o cümlədən e-İmza həllini yaradan və tətbiq edən qabaqcıl inteqratordur.

Qeyd edək ki, IV Beynəlxalq Bank Forumunda SİNAM “Müəssisə resurslarının planlaşdırılması” (SERP), “Elektron Sənəd Dövriyyəsi və Arxiv sistemi” (SESDA), “e-İmza üzrə Sertifikatlaşdırma Mərkəzi “(SPKİS) proqram kompleksi, “Təlimlərin Mərkəzi İdarəetmə Sistemi” (Edutube) və “Onlayn Video-konfrans Sistemi” (Meetadore) kimi həlləri ilə təqdim olunub.

SINAM şirkətinin rəqəmsal imza üzrə həlli Azərbaycanın Mərkəzi Bankında və Rəqəmsal İnkişaf və Nəqliyyat Nazirliyində artıq tətbiq olunub. Deloitte şirkəti tərəfindən SINAM-ın rəqəmsal imza həlli beynəlxalq sertifikasiyadan keçib və kibertəhlükəsizlik, İSO və digər istiqamətlər üzrə tam olaraq müasir tələblərə cavab verir.

Xatırladaq ki, Litvanın BS/2 şirkəti öz texnologiyalarını 80-dən artıq ölkədə tətbiq etmişdir və banklar, maliyyə müəssisələri və ticarət-servis təşkilatları üçün ixtisaslaşdırılmış proqram təminatı və texnoloji həllər hazırlayan qabaqcıl şirkətdir.

Aydan Beydullayeva