Hakerlərin hücumuna ən çox məruz qalan 10 ölkə

Rusiya dünyada hakerlərin ən çox hücumuna məruz qalan on ölkədən biridir.

Publika.az xəbər verir ki, hakerlər tərəfindən Rusiya şirkətlərinə təşkil edilən DDoS hücumlarının əsas hədəfləri dövlət sektoru (ümuminin 37 faizi) və maliyyə sənayesidir (23 faiz). StormWall analitikləri bu məlumatları "Lenta.ru" ilə paylaşıblar. Onlar həmçinin belə qənaətə gəliblər ki, 2023-cü ilin ikinci rübündə Rusiya dünyanın ən çox hücuma məruz qalan on ölkəsi sırasında olub.

Mütəxəssislər hakerlər tərəfindən ən çox istifadə edilən digər cəlbedici hücum vektorlarının telekommunikasiya (18 faiz) və enerji sektorları (7 faiz), o cümlədən neft sənayesi (5 faiz) olduğunu bildirib. StormWall həmçinin bəyan edib ki, 2023-cü ilin ikinci rübündə Rusiya şirkətlərində DDoS-ların ümumi sayı keçən ilin eyni dövrü ilə müqayisədə 28 faiz çox olub.

Hakerlərin ən çox hücumuna məruz qalan ölkələrin reytinqində Rusiya səkkizinci yerdədir. Bu siyahıda ilk üç yeri ABŞ, Hindistan və Çin tutub.

Bundan əlavə, informasiya təhlükəsizliyi üzrə mütəxəssislər qeyd ediblər ki, hakerlər əsasən şirkətlərə və ya dövlət qurumlarına maksimum zərər vurmağa imkan verən mürəkkəb DDoS hücumları təşkil edirlər.

Mehti Kamiloğlu