Müəllimlər parlamentə müraciət etdilər: Şagirdlərə mobil telefon qadağan olunacaq

İspaniyada iki müəllimin başlatdığı imza kampaniyasından sonra uşaqların mobil telefondan istifadəsinə qanuni yaş məhdudiyyətinin tətbiqi ilə bağlı müzakirələr başlayıb.

Publika.az xəbər verir ki, İspaniyanın paytaxtı Madriddə uşaqlarda cib telefonu istifadəsini qadağan etmək üçün iki müəllimin başlatdığı imza kampaniyasına qısa müddətdə 63 min adam qoşulub.

Müəllimlər mətbuata açıqlama verərək, mütəxəssislərin mobil telefondan erkən istifadənin uşaq və yeniyetmələrdə diqqət və konsentrasiyanın azalmasına, yuxu problemlərinə, depressiyaya səbəb ola biləcəyi barədə xəbərdarlıq etdiklərini və bu vəziyyəti şagirdlərində də müşahidə etdiklərini bildiriblər.

Ölkədəki 17 muxtar administrasiyadan yalnız 3-də (Madrid, Qalisiya və Castilla La Mancha) məktəbə mobil telefon gətirmək tamamilə qadağan edilib. Parlamentə təqdim edilən təklifdə 16 yaşına çatmamış uşaqların məktəbdə və ya məktəbdən kənarda mobil telefondan istifadəsinə tam qadağa qoyulması tələb olunur.

Aysel Şahmar