"Tarakan dron” hazırlandı

İsveçrə mühəndisləri uçuş zamanı maneələri dəf edən və onların yanından sərbəst ötüb keçə bilən dron hazırlayıblar.

Publika.az xəbər verir ki, İsveçrənin Federal Meşə, Qar və Landşaft Araşdırmaları İnstitutu (WSL) sıx meşə bitki örtüyü olan ərazilərdə ətraf mühitin monitorinqinin ciddi problem olaraq qaldığını bildiriblər. Budaqlar dronların uçuşa davam etməsinə mane olur və onu öz trayektoriyasından ayırır.

Buna görə də, WSL mühəndislər qrupu Sürix Federal Ali Texniki Məktəbinin və Piza Universitetinin alimləri ilə birlikdə bu problemin həllini tapıblar. Onlar müvafiq texnologiya ilə tarakanabənzər PUA yaradıblar. Belə ki, dron ətraf mühitdə budaqlar və ya digər bitki örtüyü ilə təmasda olduqda, toxunma reaksiyasını təmin edən ətraf mühit zəkası ilə təchiz edilib. İlk sınaqlarda “tarakan dron” uçuş zamanı yarpaqlı budaqları uğurla itələyə və onların yanından keçə bilib.

Alimlər növbəti mərhələdə drona eyni anda bir neçə maneəyə reaksiya verməyi öyrətməklə, onu təkmilləşdirməyi planlaşdırırlar.

Qeyd edək ki, tədqiqatın nəticələri “Nature Communications” jurnalında dərc edilib.