Həm havanı təmizləyən, həm də elektrik enerjisi istehsal edən süni bitki

Alimlər həm qapalı məkanlardakı havanı təmizləyə, həm də smartfonları doldurmaq üçün kifayət qədər enerji istehsal edə bilən süni bitki hazırlayıblar.

Publika.az xəbər verir ki, Nyu Yorkdakı “Binghamton” Universitetindən bir araşdırma qrupu 5 bioloji günəş hüceyrəsindən və bu hüceyrələrdə istifadə edilən fotosintetik bakteriyalardan ibarət süni yarpaq dizayn ediblər. Onlar daha sonra bu ixtiranın praktik tətbiqlərə çevrilə biləcəyini anlayaraq tədqiqatı genişləndiriblər.

Süni bitki prototipi 5 yarpaqlı sistemdən ibarətdir və karbon qazını təbii bitkilərdən çox daha təsirli şəkildə azalda bilir. Oksigen və elektrik enerjisi də istehsal edən bu bitki nəinki davamlı enerji təmin edir, həm də qapalı məkanların hava keyfiyyətini yaxşılaşdırır.

Sözügedən bitki fotosintez yolu ilə qapalı məkanda karbon qazının səviyyəsini 5000 ppm-dən 500 ppm-ə qədər, 90 faiz azalda bilər. Bu bitkilər də təbii bitkilər kimi işləyir. Su və qida maddələrinə ehtiyacı var.

Alimlər bu innovativ texnologiyanın havanın keyfiyyətini yaxşılaşdırmaq və davamlı enerji təmin etmək üçün potensialını vurğulayırlar.

Tədqiqat “Advanced Sustainable Systems” elmi jurnalında dərc olunub.

Roza