Süni intellekt sevgini də proqnozlaşdırmağı öyrəndi

İsraildəki Ben-Qurion Universitetinin alimləri tanışlıq tətbiqlərinin iş prinsipini imitasiya edən şəraitdə romantik cazibə hisslərini orta-yüksək dəqiqliklə proqnozlaşdıran maşın öyrənməsi modeli hazırlayıblar.

Publika.az xəbər verir ki, tədqiqat "Computers in Biology and Medicine" (CBM) jurnalında dərc olunub.

Eksperimentdə yaşı 23-dən 32-yə qədər olan 61 tələbə iştirak edib. Onlar potensial partnyorların fotolarına baxarkən beyin aktivliyi elektroensefaloqrafiya (EEQ) vasitəsilə qeydə alınıb. İştirakçılar kimləri bəyəndiklərini qeyd ediblər və sonra guya həmin şəxslərin onlara verdiyi “rəyləri” alıblar (əslində bu rəylər simulyasiya olunmuşdu). Bu yanaşma tanışlıq tətbiqlərinin əsas mexanizmini — cazibə və mümkün rədd edilməni — təkrarlamağa imkan verib.

Maşın öyrənməsi alqoritmləri beynin elektrik reaksiyalarını — yəni induksiya olunmuş potensialları analiz ediblər. Modellər iştirakçıların cazibəyə reaksiyasını 71,3% dəqiqliklə, rədd edilməyə isə 81,3% dəqiqliklə proqnozlaşdırıb. Daha az insanı cəlbedici hesab edən “seçici” iştirakçılarda alqoritmlər daha yaxşı nəticə göstərib. Alimlərin fikrincə, bu, onların neyron siqnallarının daha ifadəli və xarakterik olması ilə bağlıdır.

“EEQ siqnallarını analiz etməklə tanışlıq tətbiqlərində istifadəçinin davranışını - məsələn, sağa və ya sola sürüşdürmə qərarını - proqnozlaşdıra bilərik. Bu, emosiyaları anlamağa imkan verir: onlar kimisə cəlbedici hesab edirlərmi, yoxsa rədd edilmə ilə bağlı mənfi hisslər keçirirlər,” - deyə tədqiqat müəllifləri qeyd ediblər.

Hüseyn İbadlı