İki nəhəng arasında 135 milyard dollarlıq ANLAŞMA - Misli görülməyən yeniliklər olacaq

"Microsoft" korporasiyası və "ChatGPT" çat-botunun yaradıcısı olan OpenAI şirkəti yeni bir razılaşma imzalayıblar.

Publika.az xəbər verir ki, bu barədə "Microsoft"un bloqunda məlumat verilib.

Yayımlanan məlumatda bildirilir ki, şirkətlər öz tərəfdaşlıqlarında “növbəti fəsli” açırlar. "Microsoft" və "OpenAI", sonuncunun ictimai faydalı korporasiyaya çevrilməsi barədə razılığa gəliblər.

Bəyanatda vurğulanır ki, tərəflər real ehtiyaclara cavab verən məhsullar yaratmaq üçün indiyədək olmadığı qədər geniş imkanlar əldə ediblər.

Rekapitalizasiyadan sonra "Microsoft" "OpenAI"nin 135 milyard dollar dəyərində investisiyasını və ya 27% səhm payını əldə edəcək.

Bundan əvvəl "Microsoft"un icraçı vitse-prezidenti Yusuf Mehdi bildirmişdi ki, korporasiya "Windows" əməliyyat sisteminin dərin şəkildə yenidən işlənməsinə başlayıb və onu səsli komandalar və süni intellektlə idarə olunan platformaya çevirməyi planlaşdırır.

Şirkət rəhbərliyinin fikrincə, süni intellektin təkcə ayrı-ayrı alət kimi deyil, gündəlik istifadə olunan yüz milyonlarla ssenarinin ayrılmaz hissəsinə çevriləcəyi yeni bir təkamül mərhələsi başlayır.

Hüseyn İbadlı