Fırıldaq sxemlər, saxta reklamlar: Haram yolla milyardlar qazanırlar

"Meta" daxili sənədlərdə 2024-cü ildə ümumi satışlarının təxminən 10%-nin və ya təxminən 16 milyard dolların saxta sxemlərin və qadağan olunmuş malların onlayn reklamından əldə ediləcəyini proqnozlaşdırıb.

Publika.az xəbər verir ki, bu barədə "Reuters" məlumat yayıb.

Bildirilir ki, reklamlar arasında saxta investisiya və ticarət layihələrini, qeyri-qanuni onlayn kazinoları və qadağan olunmuş tibbi məhsulların satışını təşviq edənlər də olub. Əldə olunan şirkət sənədləri "Meta"nın "Facebook" və "Instagram"da saxta reklamların miqyasını qiymətləndirmək cəhdlərini göstərir.

Qeyd olunur ki, "Meta"nın 2024-cü ildə ümumi satışları 164,5 milyard dolları ötüb. Ötən həftə şirkət üçüncü rübdə gəlirinin illik müqayisədə 26% artaraq 51,24 milyard dollara çatdığını bildirib.

Bundan başqa nəşr 2024-cü ilin dekabrında açıqlanan aldadıcı xarakter daşıyan "yüksək riskli" fırıldaqçı reklamlardan illik gəlirin 7 milyard dollar olduğunu təxmin edən sənədə də istinad edib.

Məlum olub ki, bəzi sənədlərdə "Meta"nın saxta reklamların sayını azaltmaq niyyəti göstərilsə də, digər materiallar onların qəfil silinməsinin maliyyə göstəricilərinə mümkün təsiri ilə bağlı şirkətin narahatlığı ifadə olunub.

"Meta" sözçüsü, şirkətin saxta reklamlarla "aqressiv" mübarizə apardığını söyləyib. O, 10%-lik qiymətləndirmənin "kobud və həddən artıq geniş" olduğunu və sonrakı təhlillərin reklamların əhəmiyyətli bir hissəsinin qaydaları pozmadığını göstərdiyini deyib. O, həmçinin vurğulayıb ki, sızan sənədlər şirkətin problemi qiymətləndirmək üçün gördüyü işin yalnız bir hissəsini göstərir, onun həlli üçün atdığı addımların hamısını deyil.

Adəm