Durov bunu da bacardı - Fransa hakimiyyəti GERİ ÇƏKİLDİ

"Telegram"ın təsisçisi Pavel Durov Fransadan çıxışını məhdudlaşdıran məhkəmə nəzarətinin ləğvinə nail olub.

Publika.az xəbər verir ki, bu barədə "Bloomberg" və AFP mənbələrə istinadla məlumat yayıb.

Fransa hakimiyyətinin 10 noyabrda qəbul etdiyi qərara əsasən, Durov yenidən sərbəst şəkildə ölkədən çıxa bilər və artıq yerli polis idarəsində mütəmadi qeydiyyatdan keçməyə məcbur deyil.

Pavel Durov 2024-cü ilin avqustunda Fransada saxlanılmışdı. Ölkə hakimiyyəti "Telegram"ın təsisçisini səlahiyyətli orqanların sorğularına cavab verməkdən imtina etməkdə, haker proqramlarının və azyaşlıların pornografik xarakterli təsvirlərinin yayılmasında iştirak etməkdə, həmçinin cinayət yolu ilə əldə olunmuş pulların yuyulmasında ittiham etmişdi.

Durova Fransadan hüquq-mühafizə orqanlarının icazəsi olmadan çıxmaq qadağan edilmişdi. O, BƏƏ vətəndaşı olduğu üçün Dubaya səfərlər üçün belə icazə almışdı. Bununla yanaşı, Paris prokurorluğu onun ABŞ və Norveçə səfər etmək üçün müraciətlərini rədd edirdi.

Hüseyn İbadlı