Ağ Ev "TikTok" hesabı açdı

ABŞ Prezidenti Donald Trampın administrasiyası nazirlər kabinetinin fəaliyyətinə həsr olunmuş yeni TikTok hesabı yaradıb.

Publika.az xəbər verir ki, kabinetinin "TikTok" hesabı artıq aktivdir və verifikasiya nişanı ilə işarələnib. Hazırda hesabda üç video yerləşdirilib.

Bundan əvvəl Tramp Çin sədri Si Cinpinlə telefon danışığı zamanı bildirib ki, ABŞ Çinlə ticarət əməkdaşlığının inkişafına yardım etməyə ümid edir və "TikTok" ətrafındakı vəziyyətin tənzimlənməsi üçün ikitərəfli konsultasiyaları dəstəkləmək niyyətindədir. Öz növbəsində, Si Cinpin Pekinin bu məsələ ilə bağlı mövqeyinin dəyişməz qaldığını vurğulayıb: Çin şirkətlərin maraqlarına hörmət edir və danışıqların bazar prinsipləri əsasında aparılmasını alqışlayır.

Sentyabrın 25-də Tramp "TikTok"un ABŞ-da birgə müəssisənin nəzarətinə keçməsi barədə sazişi təsdiqləyib. Fərmana əsasən, sosial şəbəkə artıq ABŞ nümayəndələri tərəfindən idarə olunacaq və “heç bir xarici düşmən tərəfindən nəzarət edilməyəcək”. Çünki sosial şəbəkənin əvvəlki sahibi — Çin şirkəti "ByteDance Ltd." və onun filialları indi şirkət səhmlərinin 20 faizindən azına sahib olacaq.

Hüseyn İbadlı