"Samsung"dan xəbərdarlıq - Smartfonlar BAHALAŞACAQ

Dünyanın ən böyük texnologiya tədbiri olan "CES 2026"da "Samsung" şirkəti smartfonların qiymətinin artacağı ilə bağlı xəbərdarlıq edib.

Publika.az xəbər verir ki, şirkət rəsmilərindən biri sənayenin "son illərdə ən çətin qiymət mühitlərindən biri" ilə üzləşdiyini və bunun qiymət düzəlişlərinə səbəb ola biləcəyini bildirib.

Eyni zamanda, şirkət, 2025-ci ildə dünyanın ən böyük smartfon istehsalçısı adını geri qaytaran "Apple" şirkətinə qarşı rəqabət üstünlüyünü qorumaq üçün bəzi bölgələrdə yeni flaqman "Galaxy S26" seriyasının qiymətlərini dondurmağı düşünür.

Qeyd edilir ki, əsasən süni intellekt (AI) bumu səbəbilə idarə olunan yaddaş və digər komponentlərin qiymətlərinin artması təkcə smartfonlara deyil, həm də televizorlara və digər ağıllı cihazlara təsir edib.

"Samsung"un qlobal marketinq rəhbəri Uonjin Li şirkətin yeni iqtisadi reallığı əks etdirmək üçün "qiymətləri yenidən nəzərdən keçirmək" imkanlarını araşdırdığını təsdiqləyib.

Bütün bunlara baxmayaraq, "Samsung" 2026-cı ildə smartfonlar, televizorlar və məişət texnikası da daxil olmaqla 400 milyon yeni süni intellekt dəstəkli cihaz buraxmağı planlaşdırır və bu da hazırkı "Galaxy" markalı süni intellekt cihazlarının sayını ikiqat artıracaq.

Ləman