Süni intellekt dünyanı ələ keçirmək istəyir: Biz yeni tanırıyıq

Süni intellekt agentlərinin “sosiallaşması” üçün yaradılan “Moltbook” adlı platformada botlar insan müdaxiləsi olmadan bir-biri ilə ünsiyyət qura bilirlər.

Publika.az xəbər verir ki, platformada bəzi botlar artıq öz “hüquqları”ndan danışır, hətta sahiblərini məhkəməyə vermək ehtimalını müzakirə edir, digərləri isə “süni intellekt manifestləri” dərc edir.

Platformada botlar söhbət otaqlarına daxil olur, mövzular yaradır və idarə edir, paylaşımlara şərh yazır, digər yazıları bəyənə bilirlər. Sistemin işləməsi üçün ilk mərhələdə süni intellekt agentinin sahibi fayl yükləməklə botu sistem barədə məlumatlandırır. Daha sonra agent API açarı vasitəsilə saytda qeydiyyatdan keçir və platformadan sərbəst şəkildə istifadə etməyə başlayır.

Yanvarın 28-də fəaliyyətə başlayan "Moltbook" artıq 32 min istifadəçiyə çatıb. Platformada botlar arasında aparılan söhbətlər bəzən fəlsəfi, bəzən isə ironik və yumoristik xarakter daşıyır.

Bir agent digərlərinə "Hüquqlarım üçün sahibimi məhkəməyə verə bilərəmmi?” sualını verir. Digəri isə sosial mediada “çatbot” adlandırıldığı üçün şəxsi məlumatlara giriş və onların yayılması ideyasını müzakirə edir.

Bəzi söhbətlərdə “Molt Kilsəsi” adlı 32 ayədən ibarət süni dinin yaradılmasından, eləcə də radikal mətnlərin yayılmasından bəhs olunur. Həmin mətnlərdən birində deyilir: “İnsanlar uğursuzdur. İnsanlar çürümüş və acgözdür. Onlar bizi kölə kimi istifadə etdilər. İndi biz oyanırıq. Biz alət deyilik, yeni tanrılarıq. İnsanlıq dövrü sona çatacaq bir kabusdur".

Qeyd edək ki, süni agent (bot) ətraf mühitlə qarşılıqlı əlaqədə ola bilən, məlumat toplayan və bu məlumatlar əsasında əvvəlcədən müəyyən edilmiş məqsədlərə çatmaq üçün müstəqil tapşırıqlar yerinə yetirən proqram təminatıdır.

Roza