İspaniyada da "X" in "kitabı" bağlanır

İspaniyanın gənclər naziri Sira Reqo insan hüquqlarının ciddi şəkildə pozulması səbəbindən ölkədə "X" sosial şəbəkəsinə girişin məhdudlaşdırıla və ya qadağan edilə biləcəyini açıqlayıb.

Publika.az xəbər verir ki, bu barədə “Politoco” məlumat yayıb.

Qeyd edilib ki, bu, Baş nazir Pedro Sançesin 16 yaşından kiçik şəxslərə sosial şəbəkələrdən istifadəni qadağan etmək planlarını sürətləndirdiyi bir vaxta təsadüf edir. Həmin təklifin gələn həftə Nazirlər Şurasına təqdim olunacağı gözlənilir.

Fevralın 4-də İspaniya hökuməti rəqəmsal platformalardan sui-istifadə hallarına qarşı mübarizə və təhlükəsiz rəqəmsal mühit yaratmaq məqsədilə yeni tədbirlər paketini elan edib.

Baş nazir sosial şəbəkələrin qanunların tez-tez pozulduğu və cinayətlərin törədildiyi bir məkana çevrildiyini qeyd edib.

Pedro Sançes həmçinin İlon Mask və Pavel Durovun onun bu təşəbbüslərinə yönəlmiş tənqidlərinə cavab verərək, bu cür etirazların ölkənin doğru yolda olduğunu təsdiqlədiyini bildirib.

Bundan öncə isə Pavel Durov İspaniyanın mühafizə adı altında hər kəsin izlənildiyi bir ölkəyə çevrildiyini iddia etmişdi.

Hüseyn İbadlı