Oyun həvəskarlarına "Nvidia"dan üzücü xəbər

Şayiələrə görə, "Nvidia" şirkəti 2026-cı ildə istehlakçılar üçün yeni videokartlar təqdim etməyə bilər.

Publika.az "PCWorld"in insayderlərinə istinadla xəbər verir ki, "RTX 50 Super" modelinin yenilənməsi isə təxirə salınıb və ya tamamilə ləğv edilib.

Əgər bu məlumat təsdiqlənsə, uzun müddətdən bəri ilk dəfə şirkətin yeni oyun qrafik prosessorları (GPU) çıxarmadığı bir il olacaq. Həmçinin 2027-ci ilin sonuna gözlənilən növbəti nəsil RTX 60 kartlarının da gecikə biləcəyi bildirilir.

Mövcud vəziyyət qlobal yaddaş çipləri qıtlığı və şirkətin prioritetlərinin yüksək tələbatın müşahidə olunduğu məlumat mərkəzləri üçün süni intellekt çiplərinə doğru dəyişməsi ilə əlaqələndirilir. "Nvidia"nın gəlirlərində oyun videokartlarının payı 2022-ci ildəki 35 faizdən 2025-ci ildə təxminən 8 faizə qədər azalıb. Bununla yanaşı, süni intellekt həlləri daha yüksək qazanclılıq təmin edir.

Süni intellekt üçün məlumat mərkəzlərinin kütləvi inşası yaddaş çiplərinin çatışmazlığına səbəb olub ki, bu da elektronika qiymətlərinin artmasına gətirib çıxarır. Kompüter istehsalçıları cihazların qiymətinin 20 faizdən çox bahalaşa biləcəyi barədə xəbərdarlıq edirlər, ekspertlər isə bu qıtlığın aylar və ya illərlə davam edə biləcəyini hesab edirlər. Daha əvvəl "Valve" şirkəti də yaddaş böhranı səbəbindən "Steam Machine" konsolunun gecikməsi ilə bağlı vəziyyətə rəsmi münasibət bildirmişdi.

Hüseyn İbadlı