Çinin istehsal etdiyi smartfonlardakı gizli təhlükə - Məşhur bloqçu üzə çıxardı

Məşhur texnologiya bloqçusu Markes Brounli (MKBHD) son illərdə bir sıra Çin smartfon istehsalçıları tərəfindən fəal şəkildə istifadə edilən silikon-karbon batareyalarını tənqid edən video yayımlayıb..

Publika.az xəbər verir ki, bloqçu bu cür batareyaların yaratdığı risklərdən danışıb.

Onun sözlərinə görə, bu texnologiya cihazın ölçüsünü böyütmədən enerji tutumunu artırmağın bir yolu kimi təbliğ olunur, lakin bu cür batareyaların uzunömürlülüyündən şübhə edilməlidir.

O izah edib ki, belə batareyalar doldurulduqda anoddakı silikon litium ionlarını udur və həcmi üç dəfəyə qədər genişlənə bilir, boşaldıldıqda isə orijinal ölçüsünə qayıdır.

Bloqçu davamlı genişlənmə və daralmanın zamanla strukturda mikrozədələnməyə səbəb ola biləcəyini və batareya tutumunun azalmasını sürətləndirəcəyini söyləyib.

O, həmçinin qeyd edib ki, "Apple" və "Samsung" da daxil olmaqla böyük qlobal brendlər hələ də kütləvi bazar modellərində silikon-karbon batareyalarından istifadə etmirlər. Brounli bunu şirkətlərin nüfuzunu itirmək riski və potensial xərclərlə üzləşmək istəməməsi ilə əlaqələndirib.

Onun bu təhlili peşəkarlar və istifadəçilər arasında qızğın müzakirələrə səbəb olub. Bəzi izləyicilər bloqçunun sözlərinə şübhə ilə yanaşıblar və yeni batareyalarla bağlı konkret statistika tələb ediblər.

Yeni texnologiyadan istifadə edən istehsalçılar isə hələlik heç bir ictimai şərh verməyiblər.

Ləman