Həmin gün bütün dünya evə qapana bilər

Oyun dünyasının ən çox gözlənilən layihəsi olan “Grand Theft Auto 6”nın (GTA 6) 19 noyabrda satışa çıxarılacağı ilə bağlı xəbərlər artıq oyun həvəskarlarını hərəkətə keçirib.

Publika.az xəbər verir ki, 13 illik uzun fasilədən sonra gələn oyunun qlobal səviyyədə ciddi iqtisadi, infrastruktur və sosial təsirlərə malik fenomen olacağı proqnozlaşdırılır.

Ekspertlər xəbərdarlıq edirlər ki, tarixin ən böyük büdcəli media məhsulunun çıxışı ilk gün dünyada kütləvi işə və dərsə davamiyyətsizliyə, həmçinin milyonlarla insanın eyni anda nəhəng həcmli faylları yükləməsi səbəbindən qlobal internet trafikində ciddi yüklənmələrə yol aça bilər. Bundan əlavə, oyunun çıxış günü evə qapanmaların da olacağı istisna edilmir.

İnsayderlərin fikrincə, “Rockstar Games” üçün hazırda ən vacib məsələ oyunun real dünyadakı yan təsirlərini idarə etmək və görünməmiş oyunçu kütləsinə tab gətirə biləcək server infrastrukturunu təmin etməkdir. Analitiklər oyunun satış rekordlarını alt-üst edəcəyini, eləcə də həm iqtisadi, həm də mədəni sahədə yeni bir era başladacağını vurğulayırlar.

Xatırladaq ki, “Rockstar Games” oyunun bu ilin noyabrında çıxacağına dair ilkin siqnallar yaysa da, ümumi dəyəri 2 milyard dollar həcmində qiymətləndirilən layihənin satışa çıxarılmasının növbəti ilə təxirə salınacağı ehtimalı da gündəmdə qalır. (“Qafqazinfo”)