Publika.az 14 yaşında!

Bu gün "Gündəlik Teleqraf" MMC-yə daxil olan Publika.az və Teleqraf.az ( indi agentlik kimi fəaliyyət göstərir) saytlarının 14 yaşı tamam olur.

Publika.az 2012-ci ilin martın 1-də portal kimi, "Teleqraf" isə gündəlik qəzet kimi fəaliyyətə başlayıb.

Publika.az-da xəbərlərlə yanaşı, geniş araşdırmalar, təhlillər, müsahibələr, videmüsahibə, videoreportajlar, həmçinin oxucunu maraqlandıran layihələr yer alır.

Portalın iş prinsipi gündəmə uyğun xəbərlər hazırlamaq, yeni informasiya istehsal etmək və oxucunu məlumatlandırmaqdır.

Portal özündə bir neçə bölməni birləşdirir. Nida.az, Qırmızı.az, Stringer.az, Tabloid.az, Bilgi.az, Ekopublika.az, Rəsmi xronika, Dünya, Maraqlı, Mistika, İdman, Layihələr bölmələrinin hər biri alt qruplardan ibarətdir. Portalda ayrıca olaraq “Bitmiş layihələr” bölməsi də var. Bu bölmədə indiyə qədər yayımlanmış, hazırda dayandırılan layihələr toplanıb. Oxucu özünə maraqlı olan layihələri buradan tapa bilər.

Publika.az-ın əsas hədəfi siyasətdən tutmuş, şou-biznesə qədər bütün sahələri əhatə etmək və hər kateqoriyadan olan oxucuları məlumatlandırmaqdır.

Fasiləsiz xəbər yayımlamaq Publika.az-ın ilk gündən əsas hədəfi olub. Hazırda da bu məqsədə sadiq qalmaqdayıq.

Bu müddət ərzində Publika.az-la əməkdaşlıq edən bütün təşkilatlara və oxucularımıza təşəkkür edir, saytımızın daimi izləyicilərini təbrik edirik!

Qeyd edək ki, 7 fevral 2025-ci ildən “Gündəlik Teleqraf” qəzetinin və Teleqraf.com xəbər portalının bazasında “Teleqraf İnformasiya Agentliyi” (www.teleqraf.az) fəaliyyətə başlayıb.

Teleqraf İnformasiya Agentliyi (İA) 2012-ci ildə fəaliyyətə başlamış “Gündəlik Teleqraf” qəzetinin və Teleqraf.com xəbər portalının bazasında yaradılıb.

Agentlik ölkəmizdə bütün sahələrdə və mövzularda baş verən hadisələri obyektiv, dəqiq və peşəkar formada işıqlandırmağa çalışır.

Teleqraf İnformasiya Agentliyi eyni zamanda Cənubi Qafqazda və dünyada cərəyan edən prosesləri diqqətdə saxlayır, operativ xəbərlər yayır, mühüm hadisələrlə bağlı analitik məqalələr, şərhlər və təhlillər dərc edir.

Ölkə ərazisindən xəbər yaymağı qarşısına məqsəd qoymuş agentliyin şəhər və rayonlarda yerli büroları yaradılıb, Azərbaycanın dost, müttəfiq və strateji tərəfdaşları olan xarici ölkələrdə müxbir postları təsis olunub.

Tərəfsiz informasiya siyasəti həyata keçirən Teleqraf geniş kollektivlə işləyir. Məsələlərə peşəkar, əhatəli və doğru yanaşmanı təmin etmək üçün agentliyə öz sahəsində ixtisaslaşmış jurnalistlər cəlb olunub.

Müasir dövrdə informasiya siyasətinin vacib elementi olan sosial media platformalarında agentliyin istehsal etdiyi xəbər, foto və videogörüntülər oxuculara, izləyicilərə çatdırılır. Özəl materiallara üstünlük verən Teleqraf İA yerli media orqanları üçün etibarlı istinad mənbəyinə çevrilib.

Teleqraf İnformasiya Agentliyinin oxucularını təbrik edirik!