İKT

"Instagram" və "YouTube"dan 6 milyon təzminat aldı

28 Mart 2026 05:45

ABŞ-də məhkəmə "Meta" və "Google" şirkətlərini sosial şəbəkələrin istifadəçilərdə asılılıq yaratmasına görə məsuliyyətli hesab edib. Qərar presedent sayılır və texnoloji nəhənglər ilk dəfə siqaret istehsalçıları ilə müqayisə olunub.

Publika.az xəbər verir ki, iddianı KGM baş hərfləri ilə tanınan qadın qaldırıb. O bildirib ki, uşaqlıqdan "YouTube" və "Instagram"dan istifadə edib, nəticədə depressiya və özünə zərər vermə halları yaranıb.

Məhkəmə qərarına əsasən, "Meta" 4,2 milyon, "Google" isə 1,8 milyon dollar təzminat ödəməlidir. Hakimlər hesab edib ki, şirkətlər məhsulların asılılıq yaratdığını bilsələr də, riskləri gizlədiblər.

Qərarda qeyd olunur ki, problem konkret məzmundan deyil, platformaların mexanizmlərindən — sonsuz ana səhifə, avtomatik video və tövsiyə alqoritmlərindən qaynaqlanır.

Bu iş minlərlə oxşar iddia üçün presedent yaradır və gələcəkdə texnoloji şirkətlərə qarşı məhkəmə dalğasının artacağı gözlənilir. (Trend)