"iPhone 18 Pro Max"ın FOTOSU YAYILDI - Hansı yeniliklər var?

İnternetdə iPhone 18 Pro və 18 Pro Max modellərinin detallı maketlərinin görüntüləri yayılıb.

Publika.az "MacRumors" nəşrinə istinadla xəbər verir ki, yeni modellər ötənilki cihazlarla müqayisədə bir qədər böyüdülmüş kamera blokuna sahib olacaqlar.

Görüntüləri ilk olaraq "Max Tech" "YouTube" kanalının bloqeri Vadim Yuryev paylaşıb. O qeyd edib ki, bu maketlər tədarük zəncirindən alınan məlumatlar əsasında hazırlanıb və aksesuar istehsalçıları da gələcək "iPhone"lar üçün məhz bu ölçülərdən istifadə edəcəklər.

Yuryevin sözlərinə görə, yeni cihazlarda kameralar nəzərəçarpacaq dərəcədə qalınlaşıb, linzaların üzərindəki şüşə panel isə daha çox önə çıxır. Kamera modulu özü də "iPhone 17 Pro" və "17 Pro Max" ilə müqayisədə daha massiv görünür. Bununla belə, korpusun ümumi ölçüləri demək olar ki, dəyişməyib: qalınlıq eyni qalıb, hündürlük və en isə cüzi şəkildə — müvafiq olaraq 0,36 mm və 0,39 mm artıb.

Ölçmələr göstərir ki, "iPhone 18 Pro Max"ın kamera bloku ilə birlikdə ümumi qalınlığı əvvəlki modeldəki 11,23 mm-ə qarşı təxminən 11,54 mm, çıxıntılı linzalarla birlikdə isə 12,92 mm-ə qarşı 13,77 mm təşkil edir. Məlumatı sızdıran müəllif iddia edir ki, bu maketlər final dizaynı maksimum dəqiqliklə əks etdirir.

Bu dəyişikliklərin kameraların yenilənməsi ilə bağlı olduğu gözlənilir. Xüsusilə, əsas modul işıqlandırma və dərinlik üzərində daha çevik nəzarət üçün dəyişən diafraqma, teleobyektiv isə zəif işıqda daha yaxşı çəkiliş üçün genişləndirilmiş aperturaya sahib ola bilər. Həmçinin, Samsung tərəfindən hazırlanan və çəkiliş sürətini artıran, küyü azaldan yeni üçqat təbəqəli təsvir sensorundan istifadə ediləcəyi bildirilir.

Yeni xəttin rəsmi təqdimatı sentyabr ayında, "Apple"ın ilk qatlanan "iPhone" modeli ilə eyni vaxtda gözlənilir.

Hüseyn İbadlı