Planşetlər üçün süni intellekt əsaslı brauzer hazırlandı

"Perplexity" şirkəti "iPadOS" planşetləri üçün çoxşaxəli iş rejimini (multitasking) genişləndirən "Comet" süni zəka brauzerini təqdim edib.

Publika.az xəbər verir ki, bu barədə "9to5Mac" portalı məlumat yayıb.

Brauzer bölünmüş ekran rejimini və bir neçə pəncərə ilə işləmək funksiyasını dəstəkləyir. Bu isə "Comet" brauzerindən digər tətbiqlərlə paralel şəkildə istifadə etməyə imkan verir. Daxili "Perplexity" süni zəka köməkçisi iş prosesinə inteqrasiya olunub. Beləliklə, istifadəçilər proqramlar arası keçid etmədən məlumatlara sürətli çıxış əldə ediblər.

Bundan əvvəl "Comet" "iPhone" smartfonları üçün uyğunlaşdırılıb, brauzerin ilkin buraxılışı isə "Mac" kompüterlərində baş tutub. Hazırkı yenilənməyə qədər "iPad" versiyası planşet interfeysinin xüsusiyyətlərini nəzərə almadan, faktiki olaraq mobil tətbiqi təkrarlayırdı.

Tətbiqin yenilənmiş versiyası artıq "App Store" vasitəsilə yüklənmək üçün əlçatan olub. "iPhone" versiyasını artıq quraşdıran istifadəçilərin yeni funksiyaları əldə etməsi üçün tətbiqi yeniləmələri kifayət edib.

"Perplexity AI" eyniadlı süni zəka axtarış sistemini və "Comet" brauzerini yaradan ABŞ şirkətidir.

Hüseyn İbadlı