"TikTok" 3,5 milyon cərimələndi

Moskvanın Taqanski rayon məhkəməsi "TikTok Pte. Ltd." şirkətini Rusiya qanunvericiliyinə uyğun olaraq girişi məhdudlaşdırılmalı olan məlumatlara çıxışın məhdudlaşdırılması qaydasını pozduğuna görə 3,5 milyon rubl cərimələyib.

Publika.az xəbər verir ki, bu barədə Moskva şəhərinin ümumi yurisdiksiya məhkəmələrinin mətbuat xidmətindən Gazeta.ru-ya məlumat verilib.

30 iyun 2026-cı il tarixində şirkət Rusiya Federasiyası İnzibati Xətalar Məcəlləsinin 13.50-ci maddəsinin 2-ci hissəsində nəzərdə tutulmuş inzibati xətanı törətdiyinə görə təqsirli bilinib. Məhkəmə "TikTok"a 3,5 milyon rubl məbləğində cərimə şəklində inzibati cəza təyin edib.

"Məhkəmə 3 500 000 rubl məbləğində inzibati cərimə şəklində inzibati cəza təyin edib", – deyə mətbuat xidmətinin məlumatında qeyd olunub.

"TikTok" – Çinin "ByteDance" şirkətinə məxsus qısa videoların yerləşdirilməsi üçün nəzərdə tutulmuş sosial şəbəkədir. 2022-ci ilin mart ayından etibarən xidmət Rusiya istifadəçiləri üçün yeni məzmunun yerləşdirilməsi və birbaşa yayımların keçirilməsi imkanını məhdudlaşdırıb.

Hüseyn İbadlı