44 gün enerji saxlayan "ƏBƏDİ TELEFON" - "iPhone 16 Pro"nu geridə qoyacaq

İnternetdə hələ təqdim olunmamış düyməli "Nokia 300 4G Power Bank" telefonunun texniki xüsusiyyətləri ortaya çıxıb.

Publika.az xəbər verir ki, məlumatı "X" (Twitter) platformasında "Hmd_Meme's" adlı insayder yayımlayıb.

Bildirilib ki, cihaz adi mobil telefon funksiyaları ilə xarici batareyanı (power bank) birləşdirir.

Sızan məlumata görə, yenilik 2,4 düymlük QVGA ekran, 0,3 MP-lik kamera və 3700 mAh tutumlu batareya ilə təchiz ediləcək. İstehsalçı gözləmə rejimində 44 günə qədər batareya ömrü vəd edir.

İddialara görə, "Nokia 300 4G Power Bank" 5 Vt gücə qədər tərs enerji ötürmə funksiyasını dəstəkləyərək enerji bankı kimi istifadə edilə biləcək. Cihazın özü isə 18 Vt-a qədər gücə malik USB-C girişi vasitəsilə doldurulacaq.

Həmçinin bildirilir ki, telefon IP65 standartına uyğun korpus mühafizəsi, 4G şəbəkə dəstəyi, 32 QB-a qədər microSD yaddaş kartı dəstəyi, Bluetooth, 3,5 mm-lik qulaqlıq girişi, FM radio və daxili media pleyer ilə təchiz olunacaq.

Cihazın digər bir özəlliyi isə yürüşlər və parlaq işıqlandırma tələb olunan digər şəraitlər üçün nəzərdə tutulmuş güclü LED fənər olacaq. Bildirilib ki, bu fənər "iPhone 16 Pro"nun flaşından iki dəfə parlaq olacaq.

Cihazın nə vaxt satışa çıxacağı və qiyməti barədə məlumat verilmir.

Hüseyn İbadlı