“Telegram”dan möhtəşəm yeniliklər

“Telegram” messencerində yeni funksiyalar istifadəyə verilib.

Publika.az xəbər verir ki, bu barədə şirkətin bloqunda məlumat verilib.

Messencer istifadəçiləri üçün qrup və kanallarda qarşılama mesajlarını tənzimləmək imkanı yaradılıb. Bu mesajların köməyilə yeni üzvlər çat haqqında məlumat əldə edəcəklər. Belə bildirişləri yalnız kanala və ya qrupa yeni qoşulanlar görəcəklər — bu da əvvəlki istifadəçilər üçün çatı artıq dərəcədə yükləməməyə imkan verəcək.

Həmçinin “Telegram”da mesaj mətninə interaktiv düymələr əlavə edilib - onların sayəsində istifadəçilər sorğularda iştirak edə, oyun oynaya və məhsul sifariş edə biləcəklər. Qeyd olunur ki, düymələri qruplar və kanallar da daxil olmaqla istənilən çatlarda yerləşdirmək mümkündür.

Bundan əlavə, mətn redaktorunun funksiyaları genişləndirilib — indi mətnin ortasına yalnız foto və video deyil, həm də sənədlər, musiqi və digər faylları daxil etmək olar. Daha bir yenilik hədiyyələrlə bağlıdır: indi onları göndərərkən şərh əlavə etmək mümkündür.

Hüseyn İbadlı