Süni intellektlə bağlı “qiyamət” qorxusu böyüyür: Ekspertlərdən çağırış

Avropalı texnologiya şirkətləri və kibertəhlükəsizlik üzrə mütəxəssislər süni intellektlə bağlı “dünyanın sonu” ssenarilərinə inanmamağa çağırıblar.

Publika.az xəbər verir ki, bu barədə “Politico” yazıb.

Nəşrin məlumatına görə, süni intellektin insanlığı məhv edə biləcəyi ilə bağlı qorxular əsasən qabaqcıl modellər hazırlayan ABŞ şirkətləri tərəfindən gündəmə gətirilir. "OpenAI"nin avtonom agentlərinin “Hugging Face” platformasını sındırması ilə bağlı hadisədən sonra “Anthropic” şirkətinin keçmiş əməkdaşı Ceykob Kokson süni intellektin yaxın zamanda istənilən sistemi sındıra və bütün insanları öldürə biləcəyini iddia edib.

“Balderton Capital” şirkətinin tərəfdaşı və Böyük Britaniyanın Süni İntellekt üzrə Suveren Fondunun rəhbəri Ceyms Uayz isə müzakirələrin “Terminator” ssenarisinə çevrildiyini bildirib. Onun sözlərinə görə, belə bir “Terminator”un gələcəyini düşünmür.

Kibertəhlükəsizlik mütəxəssisləri hesab edirlər ki, süni intellektin ekzistensial təhlükələri ilə bağlı səs-küy real problemlərin həllinə mane olur. Kibertəhdidlər üzrə tədqiqatçı Markus Hatçins “dünyanın sonu” barədə müzakirələri əks-məhsuldar adlandırıb. O, fəlakət ssenarilərindən yaranan yorğunluğun mühüm təhlükəsizlik tədbirlərinin görülməsinə mane olduğunu vurğulayıb.

Fransanın ANSSI kibertəhlükəsizlik agentliyinin rəhbəri Vensan Strubel də hər iki həftədən bir yeni panika yaratmaq əvəzinə ciddi iş aparmağa çağırıb.

Süni intellektin ekzistensial riskləri ilə bağlı müzakirələr GPT-4 və “Claude” modellərinin təqdim edilməsindən sonra daha da intensivləşib. İlon Mask da daxil olmaqla bir sıra tədqiqatçı və sahibkarlar güclü süni intellekt sistemlərinin hazırlanmasına moratorium elan edilməsini təklif ediblər. Bununla yanaşı, bəzi ekspertlər bu xəbərdarlıqların şişirdildiyini və diqqəti kibertəhlükələr, dezinformasiya və məxfiliyin pozulması kimi real risklərdən yayındırdığını düşünürlər.

Müəllif: Adəm