“Star”da infrastruktur işlərinin 95 faizi icra edilib

“SOCAR Turkey" şirkətinin baş icraçı direktoru Kənan Yavuz “Star” neft ayırma zavodunda infrastruktur işlərinin 95 faizinin tamamlandığını açıqlayıb.

Publika.az haberler.com-a istinadən xəbər verir ki, K.Yavuz 2018-ci ildə zavodun istehsala başlayacağını deyib. Bildirib ki, zavod ölkə iqtisadiyyatına illik 2-2.5 milyard dollar qənaəti təmin edəcək: “İndiyədək zavoda 2 mlrd dollar məbləğində vəsait xərclənib. Bu ayın sonunadək zavod üçün avadanlıqların gətirilməsinə başlanılacaq. 2016-2017-ci illərdə avadanlıqlar quraşdırılacaq".

K.Yavuz "Star" zavodunun ildə 10 mln ton xam neft emal edəcəyini xatırladıb. Məlum olub ki, zavodun inşaatında 4 min insan çalışır və onların sayı gələn il 10 minə çatacaq. İşləyənlərin 98 faizi türkdür.

O zavodun ölkə iqtisadiyyatına köməyindən də söz açıb: "Star" neft emalı zavodu idxal olunan məhsulların Türkiyədə istehsalını hədəfləyən layihədir. Bu zavod təkcə "Petkim Neft-Kimya Holding"in rəqabət gücünü artırmayacaq, həm də Türkiyənin ehtiyacının qarşılanmasında önəmli rol oynayacaq. Türkiyənin dizel idxalı yerli istehsaldan qat-qat çoxdur. Biz dizel, təyyarə yanacağı və mayeləşdirilmiş neft qazı (LPG) burada istehsal edəcəyik. Zavod hazırkı neft qiymətləri ilə Türkiyə iqtisadiyyatına ildə 2-2,5 mlrd. dollar qənaət etməyə imkan verəcək".

İqtisadiyyat şöbəsi