Sərhəddən pulsuz nə və hansı məbləğdə mal keçirmək olar?

Azərbaycan vətəndaşlarının dövlət sərhədini keçərkən ölkəyə şəxsi istifadə ilə bağlı gətirə biləcəyi mallara limit qoyulub.

Publika.az Fins.az-a istinadən xəbər verir ki, Dövlət Gömrük Komitəsi fiziki şəxslərin sərhədi keçirkən ölkəyə gətirə biləcəyi malların limitlərini və mütəmadiliyini dəqiqləşdirib. Komitənin qaydalarına görə, vətəndaşlar bəzi malları ölkəyə ayda bir dəfə, digərlərini isə bir neçə ayda bir dəfə olmaqla gətirə bilərlər.

Ümumi qiymət 1500 dolları keçməməlidir

Xatırladaq ki, ölkə vətəndaşlarının şəxsi istifadə üçün xarici ölkələrdən mal gətirməsi prosesi Nazirlər Kabinetinin “Fiziki şəxslər tərəfındən istehsal, yaxud kommersiya məqsədləri üçün nəzərdə tutulmayan malların gömrük sərhədindən keçirilməsinin güzəştli və sadələşdirilmiş Qaydaları” ilə tənzimlənir. Adı çəkilən qaydalara görə, fiziki şəxslər şəxsi istifadə məqsədilə bir əşyadan iki ədəddən artıq olmadan ölkəyə gətirə bilərlər. Elə həmin sənədə görə, bununla bağlı daha bir məhdudiyyət var – hər bir fiziki şəxsin gətirdiyi əşyaların gömrük dəyəri 1500 ABŞ dollarından artıq olmamalıdır. Şəxslə birlikdə olan yetkinlik yaşına çatmayan hər nəfər üçün bu məbləğ 500 ABŞ dollarıdır.

Komitənin öz limitləri var

Başqa sözlə, həmin qaydalara görə, hər bir şəxs hər dəfə ölkəyə qayıdarkən ümumi dəyəri 1500 dollardan artıq olmamaqla mallar gətirə bilər. Amma bir şərtlə ki, bu mallar doğrudan da şəxsi istifadə üçün gətirilsin. Qaydalara görə, bunu gömrük orqanları, malların xassələri, miqdarı, habelə sərhəddən keçirilməsinin mütəmadiliyi əsasında müəyyən edirlər. Bir qədər əvvəl Dövlət Gömrük Komitəsi də məlumat yayaraq bu məsələni xatırlatmış və şəxsi limitdən artıq malların vergi və rüsumlara cəlb ediləcəyini bildirmişdi.

Ayda bir dəfə

Fins.az komitə tərəfindən vətəndaşların ölkəyə pulsuz gətirəcəyi mallarla bağlı limitləri dəqiqləşdirib. Komitədən verilən məlumata görə, vətəndaşların ölkəyə rüsumsuz gətirə biləcəyi məhsullarla bağlı limitlər onların bütün səfərlərinə yox, müəyyən müddətlərə tətbiq ediləcək. Belə ki, fiziki şəxslər 1500 dollarlıq malı ayda bir dəfə olmaqla rüsumsuz gətirə bilərlər. Özü də bu zaman bir əşyadan 2 ədəddən artıq olmamalıdır. 1 aylıq limit qoyulan mallara telefonlar, məişət və elektrik əşyaları daxildir. Məsələn, xaricdən gələn şəxs özü ilə ümumi qiyməti 1500 doları keçməyən 2 televizor gətiribsə, növbəti dəfə bunu yalnız bir aydan sonra təkrarlaya bilər: «Məsələn, aprel ayının 7-də ölkəyə 2 televizor gətirən şəxs, bunu bir də mayın7-dən sonra təkrar edə bilər».

İkiqat limit olan mallar

Bəzi mallara münasibətdə isə ikiqat limit qoyulub, yəni onların həm mütəmadiliyi, həm də əşya sayına məhdudiyyət qoyulub. Bura mobil telefonlar aiddir. «Bir nəfər iki mobil telefon gətirə bilərmi?» sualına cavab olaraq komitədə bildirilib ki, «bu şübhə yarada bilər və ola bilər ki, ikinci telefonun gətirilməsində problem olsun». Bundan başqa, mobil telefonlarla bağlı başqa bir qayda da var. Belə ki, bir neçə nəfərdən ibarət ailə, ölkəyə gələrkən hər ailə üzvü bir telefon da gətirməsinə icazə verilmir – bu da «şübhə yarada bilər». Qeyd edək ki, telefonları şəxsi istifadə üçün gətirən ailələr gömrük məntəqəsindən birlikdə deyil, hisə hissə keçməklə bu limiti ötüb keçə bilərlər. Komitədən verilən cavabdan aydın olur ki, belə hala necə nəzarət ediləcəyi hələ məlum deyil.

İldə neçə dəfə mebel gətirmək olar?

Bəzi mallara görə limitlər isə daha ciddidir. Məsələn, ölkəyə şəxsi istifadə üçün mebel dəsti gətirən şəxs, bunu bir də 3-4 aydan sonra təkrarlaya bilər. Həmin vaxtadək həmin şəxs yeni mebel dəsti gətirmək istəsə rüsum ödəməli olacaq.

“Mebel uzun müddət istifadə olunan əşyadır və onun belə tez-tez gətirilməsi vətəndaşın bunu şəxsi məqsədlər üçün etdiyi ilə bağlı şübhələr yarada bilər”, - deyə komitədən izah ediblər.

Ərzaq mallarına qoyulan məhdudiyyətlər

Məhdudiyyətlər ölkəyə gətirilən ərzaq məhsullarına da aiddir. Qaydalara görə, hər bir şəxs özü ilə ümumi çəkisi 10 kiloqram olan ərzaq məhsulu gətirə bilər. Amma bu o demək deyil ki, bir neçə nəfərdən ibarət ailə sərhədi keçərkən hər bir ailə üzvü özü ilə 10 kiloqram ərzaq gətirə biləcək – bütün ailəyə ümumi limit tətbiq ediləcək. Ayrı-ayrı ərzaq növləri ilə bağlı ayrıca limitlər var. Məsələn, ümumilikdə 10 kiloqramlıq limit keçməmək şərtilə, hər bir ərzaqdan 2 kiloqram gətirmək olar. Siqaretlərlə bağlı limit 30 qutu, alkoqollu içki ilə bağlı limit isə 3 litr təşkil edir.