Sənin qədər sadə deyiləm, ana!

Aysel Əlizadə

Anam, anam! Kamala Abiyevam. Böyük maarifçi, öyrətmən, 45 ilin intəhasız zəhmətlə çalışan müəllimi. Şairim! Azərbaycan üçün övladını Aysel Əlizadə olaraq özgür, cəsur, aydın qadın obrazı kimi yetişdirən qadın! Cəmiyyətin yüzillik "başıboş gözəl" təsəvvürünü qızına verdiyi maarifçi tərbiyə ilə darmadağın edən Azərbaycan anası! Mənim anam olmasaydın, başqa cür yetişərdim, bilirəm. Çünki bircə övladın var, onu aslan kimi böyütmüsən. Nə yazsam, necə "çox sağ ol" desəm, yetməz. Qızın olmaq kimi bir şərəfli taleyim var.

Ölkəmin təhsil dönəmi şeirinlə başlayır, şeirinlə bitir - İLLƏRDİ. "Məktəb illəri" şagirdlərin dəftərlərinə yazılır, "Son zəng" lərdə səslənir, məktəb açılışında deyilir. Hərdən məndən soruşurlar: "İlahi, bütün Azərbaycan təhsili bu qadının şeiri ilə açılıb-bağlanır. Heç elə bil ona aid deyil. Bu nə sadəlikdi?" Mən Sənin qədər sadə deyiləm, ana, ancaq gözütoxluğu Səndən öyrənmişəm. Ad, ev, imtiyaz, təltif peşində olmamağı öyrənmişəm Səndən. Hərdən deyirsən "mənə oxşama, sən haqqını istə". Susuram... Ya da uzun-uzun istəməməyimin səbəblərini izah edirəm. Bu səbəbləri isə məndən daha gözəl bilirsən. Çünki özün varlığınla öyrətmisən belə olmağı. Bəlkə hərdən ürəyinin dərinliyində "peşman" da olmusan - yaşadığım çətinlikləri, əngəlləri görüb, özlüyündə
"kaş sadə bir qadın kimi böyüdərdim, böyük amallar arxasınca getməzdi, standart həyatı olardı, daha xoşbəxt yaşayardı" düşünmüsən. Əmin ol, çox əmin, heç xoşbəxt olmazdım.

İllərdi cəhalətlə, xurafatla açıq-açığa üz-üzə gələn - ölkəmin bəlkə tək qadını kimi, haqsızlıqla savaşan yaradıcı insan kimi, yazıları ilə İnsan yetişdirən, böyük düşüncə sahiblərini sevindirən, gərəksiz, cəmiyyətə ziyanlı klişeləri poeziyası, yazdıqları, yaratdıqları və yaşadıqları ilə alt-üst edən, çox adamın öyrəndiyi, təsirləndiyi bir yazar, bir obraz kimi, dünya ağıllısı qızımla, qazandığım qızıldan qiymətli dostlarım və zəki oxucularım, sevənlərimlə bütün acı-şirin yaşantılarım və zəngin həyat yolumla Sənin qızın kimi çox mutluyam.

Sənin doğum günündə niyə özümdən yazdım? Özünlə qürur duyasan deyə. Mutluluğun mutluluğumla eyni ölçüdə, yan-yanadı deyə. Bütün narahatlığın yalnız övladınla bağlı olduğu üçün yazdım bunları... Rahat yaşa, rahat nəfəs al. Gecənin qaranlığını açıq gözlə yaşayan insan mütləq Günəşin doğuşunu görür. Səni sevirəm, Ana. Doğum günün qutlu olsun! Çox və sağlam yaşa bizim üçün...