Hacı Nuranın əməliyyatqabağı dediyi söz

Xərçəngdən əziyyət çəkən teleaparıcı Hacı Nuran Hüseynov oktyabrın 22-də əməliyyat olunacaq.

Axar.az xəbər verir ki, Almaniyada müalicə olunan Hacı Nuran özü sosial şəbəkədə əməliyyat haqda yazıb.

“Hər bir insan bu həyatda müvəqqətidir. Amma mənə təsəlli verən təkcə bu deyil. Həmişə inanmışam ki, insan əməlləri və xatirələri ilə əbədidir. Xəstə olmağımla nə zəif, nə əzgin, nə yazıq, nə də inamsız görsənmək fikrindəyəm. Sadəcə, deyəcəyim xəbər odur ki, sağlam həyatın qədrini bilin və ətrafınızdakılarla mehriban olun”, - deyə vurğulayıb.

Tanınmış aparıcı o qənaətdədir ki, heç bir xəstəlik insanı qorxuda bilmir: “İslama görə xəstəlik də imtahandır. İnşallah, sabah mən yenə bir imtahana gedəcəm - əməliyyat olunacam.

Lakin burada qəribəsi odur ki, qiymət yazan məndən heç nə soruşmayacaq. Ölkəmlə fəxr edərək, bu imtahana qürurla gedirəm. Təki vətən sağ olsun. Dualarınızı əsirgəməyin. Sizin Hacı Nuran”.

Qeyd edək ki, xərçəng xəstəliyindən əziyyət çəkən Hacı Nurana ilik transplantasiyası olunacaq.