İlhamə Quliyevanın köməkçisi: "Məni təhdid edirlər"

“Artıq xeyli vaxtdır ki, İlhamə xanımla bağlı mənə gizli nömrədən zəng edib təhdid edirlər”.

Bu sözləri lent.az-a açıqlamasında mərhum xalq artisti İlhamə Quliyevanın köməkçisi Fatma Əliyeva deyib.

O, bildirib ki, İ.Quliyevanın oğlu Orxan Nadirov və onun yaxınları ona zənglər etdiriblər:

“İlhamə xanım ölən gündən sonra xeyli vaxt mən heç bir yerə danışmadım. Hər şeyi sona qədər izlədim. Həmin vaxtda mənə nəsə deyən yox idi. Amma sonuncu dəfə verdiyim müsahibədən sonra mənə gizli nömrədən xeyli zənglər gəlir. Axırıncı dəfə zəng edən bir xanım idi. Özünü təqdim etmədi. Dedi: “Sən niyə Orxan və onun anası Lalə barədə belə danışmısan? Danışdığın sözlərə görə səni pis nəticələr gözləyə bilər”. Mənə hədə-qorxu gəldilər. Məni təhdid edirlər".

F.Əliyeva deyib ki, onunla danışanın kim olduğunu bilmir:

"Bilmirəm mənlə danışan Orxanın anası idi, yoxsa yox. Çünki onunla bir dəfə danışmışam, onda da onu acılamışam. Ona görə də səsini tam yadımda saxlaya bilməmişəm. Amma axırıncı zəngdən qabaq yığanda demişdi ki, “Mən Laləyəm, Orxanın anası”. Mənə deyirlər ki, gəl, söhbət edək, razılığa gələk, sənə də nəsə edərik. Mən də onlara etirazımı bildirdim. Dedim ki, mən bütün bu işləri nəsə qazanmaq üçün etmirəm, İlhamə xanımın mirasından pay ummuram. İlhamə xanım evdə xəstə yatan zaman hardaydı onun qohumları? İndi miras davasına çıxıblar. Allahdan başqa heç kimdən qorxmuram. Sözümü axıra qədər deyəcəm”.