Bəhram Bağırzadə: “Mənim qardaşım, Cabirim artıq yoxdur” - FOTOLAR

Əməkdar artist Bəhram Bağırzadə bu gün ölüm ildönümü olan həmkarı Cabir İmanovun xatirəsinə kitab həsr edib.

Publika.az xəbər verir ki, “Mən polis olmaq istəyirəm” (“Хочу стать полицейским”) adlı kitab sənətçinin vəfatının birinci ildönümü ərəfəsində işıq üzü görüb.

B.Bağırzadə paylaşımında Cabir İmanovla bağlı xatirələrini bölüşüb. O bildirib ki, sənətçinin vəfatından bir il keçsə də, onunla daxilində danışmağa davam edir:

“Onun olmadığı bir il tamam olur. Tam bir il onsuz. Bu il ərzində onunla daxilən danışmadığım bir gün belə olmayıb. Biz həmişə zarafat edirdik və o, indi yanımda olmasa da, bu davam edir. Bəlkə də ona görə ki, mənim üçün o, yaşayır. Haradasa yanımdadır. Sadəcə burada deyil.

Hər gün dualar oxuyuram. Bu sözlərdə yalnız dua deyil, söhbət də var. Əvvəllər olduğu kimi”.

Bağırzadə bildirib ki, kitabda Cabir İmanovun uşaqlıq arzusundan bəhs olunub. O qeyd edib ki, sənətçi uşaqlıqdan polis olmaq istəyib və xidmətə qəbul olunduğu zaman bu xəbəri ilk çatdırdığı şəxslərdən biri onun atası Arif Bağırzadə olub:

“İstəyirdi ki, atam bunu bilsin. Onun qürurunu görmək, bu anı onun üçün vacib olan insanla bölüşmək istəyirdi. İndi onların hər ikisi yoxdur. Mən isə kitab, dualar və artıq heç kimin eşitmədiyi, amma içimdə hələ də səslənən zarafatlarla qalmışam.

Qoy bu kitab vida deyil, davam olsun. Çünki biz xatırladıqca onlar bizimlədir. Onlarla danışdıqca bizi eşidirlər. Sevdikcə onlar yaşayırlar”.

Qeyd edək ki, Cabir İmanov ötən il sentyabrın 29-da 49 yaşında idman zalında qəfil ürəktutmasından vəfat edib. (Axşam.az)