MDB

Libermandan Moskvaya MESAJ: “Buna icazə verməyəcəyik”

16 Aprel 2018 23:00

“Suriyadakı fəaliyyətimizin Rusiya tərəfindən məhdudlaşdırılmasına icazə verməyəcəyik”.

Publika.az xəbər verir ki, bunu İsrailin müdafiə naziri Aviqdor Liberman “Walla News” xəbər saytına açıqlamasında bildirib.

Liberman ötən həftə Suriyanın Xüms şəhərində rejimə aid T-4 hərbi hava bazasına iki döyüş təyyarəsi ilə təşkil edilən hücumun İsrail tərəfindən həyata keçirildiyinə dair xəbərləri şərh etməkdən imtina edib. Həmin hücumda 2-si əsgər olmaqla, 7 iranlı ölmüşdü.

“Biz işimizi görürük, bütün variantlar masadadır”, - o deyib.

Liberman Tel-Əvivin Moskva ilə birbaşa qarşıdurmadan qaçdığını və iki ölkənin daim təmasda olduğunu söyləyib.

“Biz Suriyanın daxili işlərinə qarışmırıq və dünyanı düzəltməyə çalışmırıq, biz yalnız İsrailin təhlükəsizliyində maraqlıyıq. Rusiya da bunu çox yaxşı başa düşür”, - nazir vurğulayıb.

İsrailli nazir İranın Suriyada güclənməsinə də icazə verməyəcəyini sözlərinə əlavə edib.

Ömər Dağlı