"Putinin müraciəti Qərbə siqnal oldu" - Sergey Ryabkov

Rusiya Prezidenti Vladimir Putinin “Oreşnik” raketinin sınağından sonra çıxışı Qərbə Moskvanın yeni hərbi çağırışlara cavab verməyə hazır olduğuna dair siqnal verib.

Publika.az xəbər verir ki, bunu “İzvestiya”ya müsahibəsində Rusiya Xarici İşlər Nazirliyinin rəhbərinin müavini Sergey Ryabkov deyib.

O qeyd edib ki, Rusiya bütün mümkün vasitələrlə öz həyati təhlükəsizlik maraqlarını qoruyacaq.

"Bu, Kiyev rejiminin Qərb sponsorlarının təxribatlarına və eskalasiyasına cavab vermək əzmimizin bariz siqnalıdır ki, onlar vəziyyətin ciddiliyini və yaranan çağırışların hərbi həll yollarını tapmaq bacarığımızı başa düşsünlər", - nazir müavini "Oreşnik" sistemini sınaqdan keçirdikdən sonra prezidentin sözlərini şərh edərkən əlavə edib.

Bu kontekstdə Ryabkov qeyd edib ki, Rusiyanın fundamental təhlükəsizlik maraqları var və ölkədə olan bütün resurslardan istifadə etməklə etibarlı şəkildə qorunacaq.

Noyabrın 21-də Rusiya prezidenti Vladimir Putin Amerikanın ATACMS və Britaniyanın “Storm Shadow” raketlərinin Rusiyadakı hədəflərə hücumlarından sonra xüsusi çıxış edib. Dövlət başçısı bildirib ki, Qərb ölkələrinin hərəkətlərinə cavab olaraq Rusiya Dneprdəki "Yujmaş" hərbi zavodunu ən son "Oreşnik" orta mənzilli raket kompleksindən istifadə edərək vurub.

Rusiya lideri müraciətində vurğulayıb ki, heç bir müasir hava hücumundan müdafiə sistemləri belə hücumları dəf edə bilməyəcək, ona görə də gələcəkdə Ukrayna əhalisinə təxliyyə imkanlarını təmin etmək üçün əvvəlcədən xəbərdarlıq ediləcək.

Hüseyn İbadlı