Putin ev sahibinə ZƏNG ETDİ - Onlar nələri müzakirə ediblər?

Rusiya Prezidenti Vladimir Putin Səudiyyə Ərəbistanının vəliəhd şahzadəsi Məhəmməd bin Salman Əl Səud ilə telefon danışığı aparıb.

Publika.az xəbər verir ki, bu barədə Kremlin mətbuat xidməti məlumat yayıb.

Bildirilib ki, söhbət zamanı Rusiya dövlət başçısı Səudiyyə Ərəbistanının rəhbərliyini və xalqını müsəlmanlar üçün müqəddəs Ramazan ayı münasibətilə təbrik edib, Kral Salman bin Əbdüləziz əl Səuda xoş arzularını çatdırıb.

Tərəflər Rusiya-Səudiyyə əməkdaşlığının yüksək səviyyəsini məmnunluqla qeyd ediblər və onun dostluq və konstruktiv şəkildə daha da inkişafına sadiq olduqlarını təsdiq ediblər.

Onlar həmçinin bildiriblər ki, Səudiyyə Ərəbistanında aparılan beynəlxalq əlaqələri nəzərə alaraq, Məhəmməd bin Salman Ukrayna münaqişəsinin həllinin vacibliyini qeyd edib. Bundan əlavə, vəliəhd Rusiya ilə ABŞ arasında münasibətlərin normallaşmasına hər cür töhfə verməyə davam etməyə hazır olduğunu bildirib. Eyni zamanda, Putin Səudiyyə Ərəbistanının vasitəçilik səylərini yüksək qiymətləndirib və digər məsələlərlə yanaşı, fevralın 18-də Ər-Riyadda Rusiya Federasiyası və ABŞ nümayəndələri arasında danışıqların aparılması üçün əlverişli şərait yaratdığına görə krallığa təşəkkür edib.

Xatırladaq ki, fevralın 18-də Ər-Riyadda Rusiya-ABŞ görüşü baş tutub. Söhbət bir sıra iqtisadi layihələr üzrə əməkdaşlığın bərpasına, habelə Ukrayna nizamlanması üzrə mümkün təmasların hazırlanmasına və Putinlə ABŞ Prezidenti Donald Tramp arasında görüşlərin təşkilinə həsr olunub.

Rusiya Federasiyasını danışıqlar masasında xarici işlər naziri Sergey Lavrov və prezidentin köməkçisi Yuri Uşakov, ABŞ-ı isə milli təhlükəsizlik üzrə müşavir Mayk Vals, dövlət katibi Marko Rubio və Amerika liderinin Yaxın Şərq üzrə xüsusi nümayəndəsi Stiven Vitkoff təmsil edib. İqtisadi məsələlərin müzakirəsi zamanı Rusiya Birbaşa İnvestisiya Fondunun rəhbəri Kirill Dmitriyev görüşdə iştirak edib.

Hüseyn İbadlı