Dağıstanda regional fövqəladə vəziyyət elan edildi - Xəzəryanı rayonları...

Dağıstan Respublikasında genişmiqyaslı daşqınlar fonunda regional səviyyəli fövqəladə vəziyyət rejimi tətbiq edilib və tezliklə onun statusu federal səviyyəyə qaldırılacaq.

Publika.az xəbər verir ki, bu barədə Rusiya Fövqəladə Hallar naziri Aleksandr Kurenkov Rusiya Prezidenti Vladimir Putinə məruzəsi zamanı bildirib.

"Hökumət komissiyasının (fövqəladə halların qarşısının alınması və nəticələrinin aradan qaldırılması, yanğın təhlükəsizliyinin təmin edilməsi üzrə) işinin nəticələrinə əsasən, yaxın vaxtlarda fövqəladə vəziyyətin statusunun artırılması barədə qərar qəbul ediləcək", - deyə o qeyd edib.

Bundan əvvəl sinoptik Aleksandr İlyin xəbərdarlıq etmişdi ki, aprelin 10-da bölgəyə yeni siklon daxil olacaq. Mütəxəssisin proqnozlarına görə, ən çox yağıntı qərb rayonlarına düşəcək, lakin şərqdəki Xəzəryanı rayonları da sınaqlar gözləyir.

Dağıstanda martın 28-də güclü yağışlar və şiddətli külək nəticəsində yaşayış evlərini su basmağa başlayıb, bu isə elektrik enerjisinin və suyun kütləvi şəkildə kəsilməsinə səbəb olub. Genişmiqyaslı daşqın səbəbindən 132 yaşayış məntəqəsinin sakini, yəni təxminən 60 min nəfər işıqsız qalıb.

Aprelin 5-də regionda yeni dağıdıcı daşqın baş verib. Xüsusilə, Mahaçqalada torpağın yuyulması nəticəsində içərisində insanların olduğu üçmərtəbəli ev uçub. Şəhərdə fövqəladə vəziyyət rejimi elan edilib. Su basmış zonadan dörd mindən çox insan təxliyə olunub.

Hüseyn İbadlı